بھٹوکی موت، ووٹ کی عزت تار تار اور احتساب دفن

قومی اسمبلی میں متحدہ اپوزیشن کے پی ٹی آئی سے شیر شکر ہونے کے خاموش معاہدہ پر طرفین کے کرتا دھرتا بھی ابھی تک ورطہ حیرت میں ہیں ۔ پارلیمانی پارٹی میں اندھی تقلید کرنے والے منتخب اراکین دستیاب قیادت سے ایک ہی سوال تھا ” او ظالمو دسو تے سہی بنیا کی“ ہم نے حلقے کے ووٹروں کو کیا جواب دینا ہے ۔ووٹ کو عزت دو کے نعرے کا کیا بنے گا۔ سلیکٹڈ وزیر اعظم کی گردان کا کیا ہو گا ۔  این آر او نہیں دوں گا اور احتساب کے نعرہ کا تحفظ کیسے کریں گے۔ ایک سفید ریش پارلیمنٹیرین  کا کہنا تھا کہ پارلیمنٹ اس ترمیم کے بعد تمام سیاسی جماعتیں کسی سیاسی قوت  کی بجاے منتشر ریوڑ  لگ رہی تھیں جن کی اپنی کوئی سوچ نہ تھی جو گڈریے کی ایک آواز پر اپنی سمت تعین کرتی تھیں۔ ان کا کہنا تھا کہ مسٸلہ ترمیم سے نہ تھا اور پارلیمینٹرین کی اکثریت خطے کے عالمی حالات اور بھارتی دراندازیوں کے پیش نظر اس حق میں تھی کہ پاک فوج کی قیادت میں تسلسل قائم رہے۔ گلہ سیاستدانوں کے رویے سے تھا ان کے اب تک کے عوامی بیانیے سے تھا جو ایک سیٹی پر دھڑام سے نیچے آن گرا۔یہ سب کچھ کرنے  کا باعزت رستہ بھی تھا لیکن سب کچھ اتنے بھونڈے طریقے سے کیا گیا کہ کرنے والے بھی شرمندہ ہںں۔  حقیقت میں  پیپلز پارٹی نے بھٹو کو ماردیا،  نواز شریف نے ووٹ کی عزت لٹوا دی اور پی ٹی آئی کے احتساب کی موت ہو گٸی۔ اس جلد بازی میں تینوں سیاسی گروہوں کے ہاتھ میں کچھ نہیں آیا۔ یہ بھی حقیقت ہے کہ مختلف بیانیہ رکھنے والے وزیر اعظم کو پارلیمنٹ 176 ووٹ سے منتخب کرتی ہے اور ایک ترمیم 315  ووٹوں سے پاس ہوتی ہے۔ سینیٹ میں اپوزیشن کی اکثریت ہے لیکن وہاں بھی سب اقلیت جیت گٸی۔  یہ معجزہ یا کچھ بھی ہو سکتا ہے لیکن جمہوریت کا حسن نہیں۔

واقف کاران حال بتاتے ہیں کہ اس خاموش معاہدے کے اثرات آہستہ آہستہ سامنے آئیں گے۔ متحدہ اپوزیشن اور حکومتی پارلیمانی اراکین کی یہ حیرت دو چند ہو جائے گی جب اس معاہدے کی مزید تفصیلات سامنے آئیں گی۔ جن کے مطابق پی ٹی آئی حکومت اپنی مدت پوری کرے گی اور  متحدہ  اپوزیشن اس کے خلاف کسی قسم کی سنجیدہ  تحریک نہیں چلاے گی البتہ لفظی گولہ باری کی اجازت ہو گی۔ اپوزیشن کی سلیکٹڈ کی گردان ختم ہو جائے گی۔ پی ٹی أٸی بھی چور چور کا نعرہ نہیں لگاے گی۔  اسی معاہدے کی رو سے متحدہ اپوزیشن قانون سازی میں حکومت سے کچھ لو اور کچھ دو کے مطابق تعاون کرے گی جس میں نیب کے بھی پر کاٹ دیے جایں گے۔ نیب کی پکڑ سے مسلح افواج اور عدلیہ کے بعد بیوروکریسی بھی مقدس گائے ہو گی۔  صدر مملکت کی طرح وزیراعظم کو بھی استثنا حاصل ہو گا۔  چٕیف الیکشن کمشنر اور ممبران کی تقری سمیت تمام متنازعہ معاملات خوش اصلوبی سے طے پا جایں گے۔ بدلے میں اپوزیشن کو ”شفاف انتخابات“ اور انتقام سے ہٹ کر سب کا احتساب ہو گا۔ جو نیب قوانین میں ترامیم کے بعد ویسے ہی بچھو سے کیچوا بن چکا ہو گا۔ حکومت بھی اپوزیشن پر ہاتھ ہولا رکھے گی۔ اور اتنی دیر میں2023  آجائے گا اور یہ سیاسی گروہ اک بارپھر نٸی  صف آرائی کے لیے عوام کو بے وقوف بنانے کے تیاریوں میں لگ جائیں گے۔ مختصر یہ کہ آئندہ انتخابات پر سب پرانی تنخواہ پر کام کریں گے۔ البتہ احتساب کا سپر سانک چھکڑے میں بدل جائےگا۔  مسلم لیگ کے وہ اراکین جو اس معاملے میں پیش پیش تھے کھسیانی ہنسی کے ساتھ کہتے ہیں اس کے باوجود ہم اپوزیشن کریں گے لیکن کس طرح۔ جبکہ نیب قوانین کا ڈنک نکالنے سمیت کٸی دیگر معاملات پر بھی وہ حکومت سے تعاون کہ کہہ چکے ہیں۔

اپنی اپنی پارلیمانی پارٹیوں میں تمام منتخب اراکین نے اپنی قیادت سے ادھرادھر سے سنی سرگوشیوں کے متعلق بے شمار سوالات کیے جنہیں بہتر  مستقبل کی چوسنی دے کر خاموش کروا دیا گیا۔ وزیر اعظم عمران خان نے تو اپنی پارلیمانی پارٹی  کو  جواب دیا تھا وقت آنے پر أپ کو اس کے فوائد کا پتہ چلے گا۔ بلاول بھٹو نے یہ کہہ کر جان چھڑالی کہ ہماری عددی اکثریت اتنی نہ تھی کہ مزاحمت کرتے خاص طور پر جب مسلم لیگ نواز نے غیر مشروط حمایت کا اعلان کر دیا۔

قارٸین کی طرح ہم بھی اس صورتحال کو ہضم کرنا مشکل ہے اور نہ ہی یہ مبینہ معاہدہ تحریری شکل میں ہے یا کم ازکم اب تک میڈیا کی نظروں سے اوجھل ہے۔  لیکن دیوار پر لکھے ہوئے کا کون انکاری ہو سکتا ہے۔ سو انتظار کیجیے سیاسی استحکام کے نام پر مزید معجزوں کا۔

انتباہ
اس تحریر میں تجزیہ کار/کالم نگار نے جو باتیں لکھی ہیں وہ مکمل طور پر ان کی ذاتی رائے ہے۔سرخیاں کا ان سے متفق ہونا ضروری نہیں۔